کتێبی: ڕمان و ڕامان نووسینی: مامۆستا کرێکار (فک اللە ڕسرە) بواری: مێژوو، شیکاری مێژوویی، واقیعناسی بەرھەمی: زانکۆی ئازادی دیراساتی ئیسلامی (زادی) بڵاوکراوەی: ماڵپەڕی (زادی ڕێمان) چاپ و بڵاوکردنەوەی: نووسینگەی تەفسیر - ھەولێر نۆرەی چاپ: سێیەم ژمارەی لاپەڕە: ١۷٦ لاپەڕە جیاوازی چاپی سێیەم لە چاپەکانی یەکەم و دووەمی کتێبەکە، ڕاستکردنەوەی کۆمەڵێک ھەڵەی نووسینەکییە لە داڕشتن یان ساڵ و شوێن و ناوەکاندا، کە سوپاس بۆ خوای گەورە لە چاپی نوێدا ئەوانە و سەرجەم کەموکورتییەکانی ڕێنووس و خاڵبەندی چاککراون و بە دیزاین و چاپێکی زۆر جوانەوە خراونەتەوە بەردەستی خوێنەرانەوە. کتێبی ڕمان و ڕامان، ناوەکەی پێکهاتووە لە دوو بەش، (ڕمان) کە بە واتای کەوتنێکی تەواوەتی دێت، ئاماژەیە بۆ کەوتنی خیلافەتی ئیسلامی وەکو ڕەمزی دەسەڵاتی موسوڵمانان، کەوتنی سەرجەم قەوارە و هێزەکانی موسوڵمانانیش لە تەواوی پارچەکانی تری خاکی موسوڵماناندا، تا بەیەکجاری شتێک بەناوی (دارولئیسلام)ەوە نەما. وشەی (ڕامان)یش، ڕوانینێکی قووڵ و شیکارییە بۆ ئەو ڕمانە؛ لە هۆکار و ئەنجامی، تا جارێکی تر پەند لەو ئەزموونە وەرگرینەوە بۆ سەرلەنوێ هەستانەوە. هەروەها ڕامانێکیشە لە هەوڵی سەدساڵەی موسوڵمانان بۆ هێنانەوەی سایەی دەسەڵاتی ئیسلامی و ڕاستکردنەوەی منارەی کەوتوومان. کتێبەکە دێڕ بە دێڕی زێڕە و بڕگە بە بڕگەی پەند و وانە و دەرسی قووڵە.