ئیسلام تاكە سیستمە كە هەموو ڕێگاكانی خاوەنێتی لەسەر بناغەی ڕاست و ڕەوای دادپەروەری داڕشتووە، سنووری وردەكارانەی داڕشتووە، مافی لایەنەكانی بەڕۆشنی تێدا دیاریكردووە، ئەنجامی ماڵ و سامانی دیاریكردووە كە دابەشكردنەكەش بەڕێژە نەگۆڕەكانی میرات (كە هەتا ئێستاش هیچ وڵاتێكی پێشكەوتووی دنیا نەیگەیشتۆتێ)، لەهەموو لایەكەوە بەرژەوەندیی توێژەكانی خەڵكی ڕەچاوكردووە، بێ ئەوەی دەوڵەمەندیش بچەوسێنێتەوە، بەشێوەیەك كە هەم لەگەڵ سروشتی مرۆڤدا بگونجێت هەم لەگەڵ ئەو مەبەستەدا كە مرۆڤی لەسەرزەمین بۆ خەڵقكراوە، كە لەگەڵ لایەن و ڕەهەندەكانی تری ئاڕاستەی ئیسلامدا سازاوە بۆ پارسەنگ پەروەردەكردنی مرۆڤی خێرخواز و چاكساز، لەهەمان كاتدا تاك تێر و كۆمەڵگە هێمن دەكات و یاسا و ڕێسایەكی پارسەنگیان دەخاتە بەردەست كە ئابورییەكی پاك و بەسیان بۆ دابین بكات، هەر هەمووشی لەگەڵ حەقدا دێتەوە، بەرژەوەندی تاكوكۆی كۆمەڵگە و دەوڵەت دەهێنێتەدی و ناهێڵێت نە مافی خاوەنێتی تاك بفەوتێت و نە بواری گەشەكاریی لەبەردەمدا تەنگ ببێتەوە، نە ڕێ بەدەوڵەتیش دەدات دەستدرێژی بكاتە سەر مافی تایبەت و گشتیی دانیشتوان و نە ڕێ دەدات هێزی دەوڵەت بكاتە ئامێری تین و فشار و مەنزیلەی دەوڵەت ببێتە هۆكاری داڕشتنی یاسای زەوتكردن و ماشینەوە و چەوساندنەوە. پێش هەموو شتێك و دوای هەموو یاسا و ڕێسایەك هەمیشە ئەوە دەخاتەوە یاد كە ئەمە دینی خوای كارزان و دادپەروەرە كە كردوێتییە بەرنامە و ڕێبازی ژیان و مرۆڤایەتی.. جا كێش هەیە بەرنامە و ڕێبازی جوانتر لەهی خوای گەورە داڕێژێت:ﱡﭐ ﲌ ﲍ ﲎ ﲏ ﲐﲑ ﲕ ﱠﱠ البقرة: ١٣٨ واتە: كێ جوانتر لەدینی خوا دێنێتەكایەوە؟! بۆیە هەرسیستمێكی ئابووریی بگریت، چونكە لەدید و تێڕوانین و پێناسەی لێڵ و هەڵەوە هاتووە، دەبینیت پڕە لەخاڵی لاواز و كەلێن و كون، پڕە لە جوانكردنی زوڵم و دەستدرێژی، پڕە لەچەواشەكاریی سامان زەوت كردن و ڕەنج بردن بەناوی یاسا و دادپەروەرییەوە، دەبینیت زۆر ئاسان و بەڕادە و بڕی ئێجگار زۆر مافی تاك و كۆ -لەبەرژەوەندیی چینێكدا- پێشێل دەكرێت.