دەبوو ئیبراهیم پێغەمبەر هێندە هەڵەشە نەبوایە دەست ببات بۆ بتەکانی وڵات کە ئەوکات پیرۆز و هێڵی سوور بوون، دەکرا نەرمیەک بنوێنێت هەتا لە دڵی کۆمەڵگەدا جێی ببێتەوەو بەرەبەرە ڕەوشەکە بگۆڕێت، نەوەک خۆی بە فەتارەتدا بدات و بڕیاری سووتاندنی بدرێت، ئەبوو مووسا وا بە ڕاشکاوی بە فیرعەونی نەوتایە سەرکەش و لادەر و ستەمکار، دەکرا بە حیکمەتەوە بچوایەتەوە ناو کۆشک و لەوێوە گۆڕانکاریی لە بنکەی دەسەڵاتدا بکردایە. ئەبوو ساحیرەکانی لای فیرعەون حیکمەتیان بەکاربهێنایە و لەسەر هیچ خۆیان نەفەوتاندایە، دەبوو بە نهێنی باوەڕ بهێنن و بمێننەوە و بە پەنهانی بانگەواز بکەن بۆ ئەوەی سەدان کەس بەهۆی ئەوانەوە باوەڕ بهێنن، نەئەبوو پێغەمبەری خوا یەکسەر بچێت بە گژی بتەکاندا، هۆزپەرستیی سووک بکات، دەبوو پێگەی جەماوەری و پشتیگری قوڕەیشی بقۆستایەتەوە بۆ سەرخستنی پەیامەکەی، دواتر بە حیکمەتەوە ئەو شتانەی بگۆڕیایە، چونکە ئەگەر بکوژرایە، دینەکەش نەدەما. ئەمانە قسەی دڵی حەکیمە موسڵمانەکانی سەدەی ۲۱ ن و لەبەر حیکمەتیان نایڵێن، من نەفامانە درکاندم.