ئیرادەی شەرعی و ئیرادەی کەونی خوای گەورە لە چەند خاڵێکدا: ١ـ خوای گەورە دوو جۆر ئیرادەی ھەیە: یەکەم: ئیرادەی شەرعی. دووەم: ئیرادەی کەونی. ٢ـ نموونە بۆ ئیرادەی شەرعی: خوای گەورە ئیرادەی وایە کە نوێژی واجب کردووە. واجبکردنی نوێژ لەسەرمان لەلایەن خواوە بە ئیرادەی شەرعی خوای گەورە بووە. واتە: ئیرادەی خوای لەسەر بووە، لەھەمان کاتیشدا پەیوەستە بە یاسا و شەرع بۆ بەندەکان کە دەبێت ئەنجامی بدەن. نموونە بۆ ئیرادەی کەونی: ڕوودانی بومەلەرزە. ڕوودانی بومەلەرزە یان ھەر دیاردەیەکی تری کەونی کە ڕوودەدات، ئیرادەی کەونی خوای گەورەی لەسەرە نەک ئیرادەی شەرعی. واتە: پەیوەست نییە بە یاسا و ڕێسا بۆ بەندەکان، بەڵکو دیاردەیەکی کەونییە و خوای گەورە دەیھێنێتە بوون. ٣ـ ھەموو ئیرادەیەکی شەرعی، خوای گەورە لێی ڕازییە و خۆشی دەوێت. بەڵام مەرج نییە ھەموو ئیرادەیەکی کەونی خۆش بوێت. بۆ نموونە: خوای گەورە لە: (نوێژ، ڕۆژوو، زەکات، حەج، سەدەقە، سیلەی ڕەحم، زیکری خوا، یارمەتی خەڵک...) خوای گەورە لەھەموو ئەمانە ڕازییە و خۆشی دەوێن، چونکە ئیرادەی شەرعی خوای گەورەیان لەسەرە. بەڵام لە: (بوونی کوفر و ئیمان، بومەلەرزە، نەخۆشی، قات و قڕی و برسیەتی..) خوای گەورە ئەمانەی خۆش ناوێت، با ئیرادەیشی لەسەریان ھەبێت. ٤ـ مەشیئەت: مەشیئەت وەکو ئیرادە نییە دووجۆری ھەبێت، بەڵکو تەنھا یەک جۆری ھەیە، ئەویش مەشیئەتی کەونییە. ئەشێت بڵێین مەشیئەتی کەونی ھەمان ئیرادەی کەونییە، کە باسمان کرد. شەرحی مەتنی تەحاوی م. دلێر گەرمیانی